Ministri i Punëve të Brendshme, Besfort Lamallari, ka paralajmëruar drejtuesit e automjeteve se kontrolli në rrugë vijon pandërprerë, falë përdorimit të teknologjisë së avancuar.
Në një mesazh drejtuar qytetarëve, Lamallari theksoi se monitorimi tashmë nuk varet vetëm nga prania fizike e policisë, pasi “syri i teknologjisë” është aktiv në të gjitha akset rrugore, duke evidentuar në kohë reale çdo shkelje.
Sipas tij, përmes dronëve dhe mjeteve inteligjente po identifikohen një sërë shkeljesh, si tejkalimi i shpejtësisë, drejtimi i mjetit nën efektin e alkoolit, përdorimi i celularit gjatë drejtimit dhe parkimet e gabuara.
“Vërtet mund të mos ketë policë në rrugë, por mjetet inteligjente dhe dronët janë kudo për të kapur shkelësit. Syrit të pagabueshëm të teknologjisë nuk i shpëtoni dot”, u shpreh ai.
Ministri nënvizoi se kjo strategji synon të rrisë ndërgjegjësimin dhe përgjegjshmërinë e drejtuesve, duke kontribuar në rritjen e sigurisë rrugore dhe uljen e aksidenteve në vend.