Trafiku i drogës në kufirin shqiptaro-grek vijon me intensitet të lartë. Policia greke ka goditur një tjetër rast të trafikut të marijuanës, duke sekuestruar 193 kilogramë e 212 gramë në një zonë të pyllëzuar pranë Konicës, vetëm pak kilometra larg kufirit me Shqipërinë.
Sipas Departamentit të Narkotikëve të Janinës, gjatë një operacioni të përbashkët me policinë e Konicës, një automjet privat u sinjalizua për kontroll, por drejtuesi i tij tentoi të largohej me shpejtësi.
Pas një ndjekjeje të shkurtër, ai humbi kontrollin e mjetit, i cili doli nga rruga, dhe më pas u arratis në këmbë në errësirë, duke përfituar nga terreni malor.
Në mjetin e braktisur, që mbante targa të huaja, u gjetën 125 pako marijuane me peshë totale 193.2 kilogramë, të cilat u sekuestruan bashkë me automjetin. Hetimet vijojnë për identifikimin e shoferit dhe të rrjetit që qëndron pas trafikut.
Sipas autoriteteve greke, vetëm në dy muajt e fundit janë sekuestruar rreth 435 kilogramë marijuanë me origjinë të dyshuar nga Shqipëria, në operacione të zhvilluara në Selanik, Kostur, Janinë dhe Igumenicë — madje edhe në tentativa për trafikim detar.
Policia greke ka shtuar ndjeshëm kontrollet përgjatë kufirit, pasi ngarkesat e fundit tregojnë se rrjetet e trafikut ndërkufitar vijojnë të jenë aktive dhe të organizuara, duke kërkuar rrugë të reja për të kaluar drogat drejt territorit grek.