Rasti i një fëmijë nga Durrësi i cili mësohet se është prekur nga meningiti akut, ditën e sotme bëri bujë nëpër rrjet.
Për rrjedhojë drejtoresha e shkollës ku ky nxënës studionte, Merita Bekteshi në një intervistë për Report.Tv shprehet se sot ka pasur shumë mungesa në shkollë pasi prindërit janë në panik.
“Jemi vënë në dijeni mbrëmjen e djeshme (e hënë) pas procesit mësimor. Shkolla jonë bën mësim turn i dytë dhe e kemi mbaruar mësimin në 17:30 dhe në orën 19:00 jam vënë në dijeni nga mjekja epidemiologe e se nxënësi i klasës 8 B me iniciale H.A. ka dalë pozitiv me meningjit bakterial. Mësimi vazhdon në shkollën “Eftali Koçi”, e cila është shkollë pritëse për klasat e shkollës “Kushrimi i Lirisë”, e cila po i nënshtrohet rikonstruksionit, ndaj bëjmë mësim turn i dytë. Të premten ka qenë në shkollë nxënësi dhe nuk ka pasur shenja të gripit apo dicka tjeter. Sëmundja ka evuluar të shtunën e të dielën. Mjekja e NjVShK më ka thënë që nxënësit e klasës dhe mësuesit që kanë dhënë mësim në atë klasë duhet të marrin antibiotik. Ditën e sotme, mqs këtu bëjmë mësim dy shkolla, pyeta vetë nëse duhet bërë dezinfektim në shkollë, por më thanë që nuk është e nevojshme. Sot, siç e prisnim në klasën e 8-të B, ka patur shumë mungesa në klasë për shkak të panikut. Gjendja e nxënësit të sëmurë është problematike dhe normal që prindërit e tjerë janë të shqetësuar. Gjendja është kjo që është, por mendoj se s’ka nevojë për panik tek nxënësit e tjerë. Ky është rasti i dytë që ndodh në Durrës dhe është shqetësuese. Uroj që fëmija të shërohet”, shprehet Bekteshiu.