Rritja e pagës minimale ka sjellë edhe një rritje të mbështetjes financiare për të papunët, duke bërë që buxheti i shtetit për pagesat e papunësisë të shkojë në rreth 1 miliard lekë në vitin 2026, krahasuar me 800 milionë lekë të parashikuara për 2025.
Pagesa e papunësisë synon të mbështesë ata qytetarë që humbasin vendin e punës për arsye të ndryshme, si shkurtimi i stafit, ndërprerja e kontratës apo falimentimi i ndërmarrjes. Sipas relacionit të projekt-buxhetit për 2026, shpenzimet për këtë skemë parashikohen në 1 miliard lekë. Për periudhën 9-mujore të vitit 2025, pagesat ishin 506 milionë lekë, ose 89.9% e planit të periudhës, duke shënuar një rënie prej 21.4% krahasuar me të njëjtën periudhë të vitit 2024.
Konkretisht, një qytetar i papunë në 2026 do të përfitojë një pagesë më të lartë. Duke u bazuar te politika aktuale, pagesa për një të papunë arrin rreth 50% të pagës minimale. Me rritjen e pagës minimale në 500 euro, mbështetja për një të papunë do të jetë 250 euro, krahasuar me 200 euro në 2024.
Relacioni i buxhetit thekson se, edhe pse varfëria po ulet, progresi nuk është i barabartë dhe grupet më vulnerabël, si të papunët, kanë nevojë për politika dhe programe të dedikuara mbështetëse. Pagesa e papunësisë shpërndahet për periudha nga 3 deri në 12 muaj, në varësi të kohës së kontributeve të paguara, që mund të jenë nga 1 deri në 10 vite.
Sipas të dhënave të Institutit të Statistikave, niveli i papunësisë ka rënë gradualisht. Në tremujorin e dytë të vitit 2025, ky tregues arriti në 8.5%, me përqindje më të lartë tek gratë dhe më të ulët tek burrat, ndërsa e njëjta tendencë vërehet edhe tek të rinjtë 15-29 vjeç.