Emiratet e Bashkuara Arabe kanë njoftuar një plan gjigant investimesh në Shtetet e Bashkuara, me vlerë 1.4 trilion dollarë gjatë dekadës së ardhshme. Lajmi u bë i ditur të enjten nga presidenti i Emirateve, Sheikh Mohamed bin Zayed (MBZ), gjatë një takimi zyrtar me Donald Trump në Abu Dhabi.
Sipas MBZ, investimet do të përqendrohen në sektorë strategjikë si teknologjia, inteligjenca artificiale dhe energjia, duke theksuar se marrëdhëniet SHBA–EBA janë “në kulmin e tyre” dhe janë forcuar ndjeshëm gjatë presidencës së Trump.
“Ky është një partneritet i fortë që ka lulëzuar nën udhëheqjen tuaj,” tha MBZ, duke shtuar se vendi i tij do të vazhdojë të punojë me SHBA-në për paqen dhe stabilitetin në rajon.
Kjo ndalesë në Abu Dhabi ishte pjesë e turneut të Trump në shtetet e Gjirit. Gjatë takimit, ai u nderua me Urdhrin e Zayed, çmimi më i lartë civil në Emiratet e Bashkuara, si shenjë e mirënjohjes për marrëdhënien e ngushtë mes dy vendeve.
Trump nga ana e tij e quajti presidentin e Emirateve një “luftëtar të madh” dhe theksoi se marrëdhëniet mes dy vendeve janë “në nivelin më të lartë të mundshëm”.