Autoritetet zvicerane kanë konfirmuar se zjarri tragjik që shpërtheu në një bar brenda një resorti skish është shkaktuar nga fishekzjarre të vendosura në shishe shampanje, të cilat u afruan tepër pranë tavanit të lokalit.
Kryeprokurorja Beatrice Pilloud bëri me dije se hetimet paraprake kanë vërtetuar disa nga pistat e para të ngritura menjëherë pas ngjarjes. Sipas saj, fishekzjarrët apo flakadanët e përdorur gjatë festës ndezën shpejt tavanin, duke shkaktuar një zjarr të fuqishëm që u përhap brenda pak çastesh.
Përhapja e flakëve u favorizua edhe nga materiali sintetik izolues që mbulonte tavanin e ulët të sallës. Në vendngjarje vijojnë të jenë forcat e mjekësisë ligjore, ndërsa raportohet se disa persona, përfshirë edhe të mitur rreth 15 vjeç, po marrin trajtim mjekësor për djegie të rënda.
Zyrtarët paralajmërojnë se identifikimi i plotë i viktimave mund të kërkojë ditë apo edhe javë. Ndërkohë, Prokuroria Federale po heton edhe funksionimin e sistemeve dhe daljeve të sigurisë, si dhe përgjegjësitë e mundshme të pronarëve të lokalit “Le Constellation”, një çift shtetasish francezë.