Prokuroria e Elbasanit ka nisur një hetim zyrtar mbi zjarrin masiv që ka përfshirë prej ditës së djeshme (1 korrik) landfillin e mbetjeve urbane në periferi të qytetit. Në një reagim zyrtar, Policia bën me dije se hetimet po kryhen nga specialistët për Hetimin e Krimeve të Komisariatit të Elbasanit, nën drejtimin e Prokurorisë, me qëllim zbardhjen e plotë të rrethanave, përcaktimin e shkakut dhe identifikimin e përgjegjësve të mundshëm.
Aktualisht, shërbimet zjarrfikëse dhe forcat e rendit janë ende në terren dhe po punojnë për neutralizimin e flakëve, të cilat kanë përfshirë një sipërfaqe të konsiderueshme të vendgrumbullimit. Autoritetet nuk kanë dhënë ende detaje për dëmet konkrete apo për ndonjë rrezik të mundshëm për zonat përreth, por konfirmojnë se situata mbetet nën monitorim të vazhdueshëm.
Në pritje të përfundimit të hetimeve, mbetet për t’u parë nëse kemi të bëjmë me një zjarr aksidental, për shkak të temperaturave të larta dhe materialeve të ndezshme në terren, apo me zjarrvënie të qëllimshme.