Përballë situatës së rëndë nga zjarret në Parkun Kombëtar të Lurës dhe në Dukat të Vlorës, Shqipëria ka kërkuar ndihmë ndërkombëtare përmes Mekanizmit të Mbrojtjes Civile të Bashkimit Europian.
Italia iu përgjigj menjëherë thirrjes duke sjellë dy avionë zjarrfikës të tipit “Canadair” dhe trupa shtesë që tashmë po operojnë në zonën e “Liqenit të Luleve”, një nga zonat më të ndjeshme ekologjikisht në veri të vendit.
Ndërkohë, edhe Greqia dërgoi dy avionë të ngjashëm për të përballuar përhapjen e zjarrit në Dukat të Vlorës, ku flakët kërcënojnë sipërfaqe të mëdha pyjore.
Agjencia Kombëtare e Mbrojtjes Civile, në bashkëpunim me forcat tokësore dhe ndihmën ndërkombëtare, vijon përpjekjet për të izoluar vatrat dhe për të mbrojtur jetën dhe pronën e qytetarëve.