Një incident i rrezikshëm është regjistruar mbrëmjen e sotme në Shkodër, ku një furgon është përfshirë nga flakët pranë një servisi automjetesh që funksionon edhe si gomisteri.
Ngjarja ndodhi në kilometrin e 2-të të rrugës Shkodër–Hani i Hotit, ndërsa punonjësit po kryenin punime saldimi poshtë mjetit. Në mënyrë të papritur, furgoni ka marrë flakë dhe është shkrumbuar plotësisht.
Fatmirësisht, punëtorët dhe personat e tjerë që ndodheshin në vendngjarje kanë arritur të largohen në kohë, duke shmangur lëndime apo pasoja më të rënda.
Në vendngjarje kanë mbërritur menjëherë forcat zjarrfikëse, të cilat bënë të mundur shuarjen e flakëve dhe parandalimin e përhapjes së zjarrit.
Si pasojë e incidentit, përveç furgonit të djegur, është dëmtuar edhe një automjet tjetër aty pranë, ndërsa dëme materiale janë shkaktuar edhe në ambientet e servisit dhe gomisterisë.
Grupi hetimor, në bashkëpunim me ekspertët e zjarrfikësve, po punon për të zbardhur shkaqet e plota të ngjarjes, e cila paraprakisht dyshohet të ketë ndodhur për shkak të pakujdesisë gjatë punimeve.