Një zjarr i fuqishëm ka përfshirë jahtin luksoz “Sea Lady II” në portin e Saint-Tropez, duke shkaktuar alarm në Rivierën Franceze. Mjeti lundrues 41 metra i gjatë, i cili akomodon deri në 10 persona dhe jepet me qira për rreth 65 mijë euro në javë, është shkatërruar plotësisht nga flakët.
Zjarrfikësit u përballën fillimisht me vështirësi për të hyrë në bord, ndërsa autoritetet evakuuan menjëherë anijet përreth për të shmangur përhapjen e zjarrit. Fatmirësisht, nuk raportohet për të lënduar.
Sipas autoriteteve franceze, dyshohet se jahti është fundosur në port pas incidentit, ndërsa shkaku i zjarrit mbetet ende nën hetim.