Një zjarr i fuqishëm ka përfshirë mesditën e kësaj të marte një fermë blegtorale në Patos, duke shkaktuar dëme të mëdha materiale dhe humbje të konsiderueshme në bagëti.
Sipas informacioneve paraprake, flakët janë përhapur me shpejtësi, të favorizuara nga temperaturat e larta dhe prania e sasive të mëdha të ushqimit të depozituar për bagëtitë. Fermerët, me ndihmën e banorëve të zonës, u përpoqën të shpëtonin kafshët, ndërsa në vendngjarje ndërhynë menjëherë forcat zjarrfikëse të Patosit.
Për shkak të intensitetit të flakëve dhe rrezikut që zjarri të përhapej në objektet përreth, operacionit iu bashkuan edhe efektivët e shërbimit zjarrfikës të Fierit.
Pas disa orësh ndërhyrjeje, ekipet arritën të vinin situatën nën kontroll dhe të shmangnin përhapjen e mëtejshme të zjarrit.
Bilanci paraprak tregon se janë djegur mbi 10 krerë bagëti, ndërsa flakët kanë shkrumbuar edhe sasi të mëdha ushqimi për kafshët, makineri bujqësore dhe stallën e fermës. Dëmet materiale vlerësohen paraprakisht në rreth 7 milionë lekë.
Në vendngjarje ndodhen shërbimet e Policisë dhe grupi hetimor, të cilët kanë nisur veprimet për të përcaktuar shkaqet dhe rrethanat që çuan në rënien e zjarrit.