Prej më shumë se dy javësh në Memaliaj është zhdukur pa gjurmë 30-vjeçari Eraldo Muça, një nga miqtë më të afërt të Aleksandër Sadikajt. Familjarët kanë bërë kallëzim në polici dhe kërkojnë hetime të thella për zbardhjen e fatit të tij.
Para zhdukjes, Eraldo është parë duke ndaluar te ferma e kuajve të familjes Sadikaj dhe më pas ka udhëtuar drejt Durrësit. Sipas burimeve policore, i riu është parë për herë të fundit në autostradën Durrës-Tiranë dhe prej asaj kohe nuk ka asnjë informacion për vendndodhjen e tij.
Familja dyshon se mund të jetë përfshirë në një ngjarje kriminale me motive hakmarrjeje, ndërsa policia nuk përjashton pista të ndryshme.
Eraldo ishte mik i ngushtë i Aleksandër Sadikajt, i njohur si Sanço, i cili u vra në qershor të 2022 në një atentat mafioz me tritol pranë TEG-ut. Pas kësaj, mes grupit të Sadikajt dhe grupit kundërshtar të vëllezërve Papa janë regjistruar disa ngjarje të rënda kriminale, përfshirë vrasjen e Edmond Papës dhe masakrën në Memaliaj ku humbën jetën tre persona, përfshirë babain e kushërinjve Kalemi.