Nga oxhaku i Kapelës Sistine në Vatikan sot është ngritur tym i zi, shenjë që konfirmon se raundi i parë i votimit për zgjedhjen e Papës së ri nuk ka sjellë një fitues.
Ky zhvillim ishte i pritshëm, pasi zgjedhja e një pape në votimin e parë është tepër e rrallë. Sipas traditës, kardinalët do të vazhdojnë me disa raunde të tjera votimi në ditët në vijim.
Vëmendja tashmë është përqendruar tek dita e nesërme, kur priten disa votime të tjera. Shtatë papët e fundit janë zgjedhur të gjithë pas sinjalit të tretë të tymit, çka i jep ditës së nesërme një rëndësi të veçantë.
Kardinalët janë mbledhur në Vatikan për të zgjedhur pasuesin e Papa Françeskut, i cili ndërroi jetë të hënën e Pashkëve. Nuk dihet se sa do të zgjasë konklava, megjithëse në historinë moderne zakonisht ka përfunduar brenda pak ditësh – ndryshe nga shekujt e mëparshëm, kur procesi zgjaste edhe me muaj për shkak të mosmarrëveshjeve.