Në Vatikan ka nisur pasditen e sotme Konklava për zgjedhjen e Papës së ri të Kishës Katolike Romake. 133 kardinalë janë izoluar në Kapelën Sistine, duke filluar procesin për të zgjedhur pasuesin e Papës Françesku, i cili dha dorëheqjen për arsye shëndetësore.
Me frazën tradicionale latine “extra omnes” – që do të thotë “të gjithë jashtë” – është sinjalizuar nisja zyrtare e procesit dhe izolimi total i kardinalëve nga bota e jashtme. Gjatë kësaj kohe, atyre u ndalohet çdo formë komunikimi, përfshirë pajisjet elektronike.
Më herët gjatë ditës, kardinalët morën pjesë në meshën “Pro eligendo Romano Pontifice” në Bazilikën e Shën Pjetrit, një rit solemn që i paraprin votimit për kreun e ri të Selisë së Shenjtë.
Ndër emrat kryesorë të përfolur për fronin papnor janë:
Pietro Parolin, kardinal italian dhe ish-sekretar i Shtetit të Vatikanit, një figurë me ndikim të fortë, i njohur për balancën mes reformës dhe unitetit kishtar.
Pierbattista Pizzaballa, Patriarku Latin i Jeruzalemit, me përvojë të gjatë në Lindjen e Mesme dhe dialogun ndërfetar.
Luis Antonio Tagle, kardinal filipinas, i afërt me linjën e Papa Françeskut dhe shumë i dashur në komunitetin katolik global.
Tymi i parë – i bardhë (nëse zgjidhet Papa) ose i zi (nëse nuk ka marrëveshje) – pritet të dalë nga oxhaku i Kapelës Sistine rreth orës 19:00 të mbrëmjes. Për t’u zgjedhur Papa, një kandidat duhet të marrë votat e 2/3 të kardinalëve, përkatësisht të paktën 89 vota. Në rast se nuk ka konsensus në raundin e parë, votimet do të vazhdojnë me dy raunde paradite dhe dy pasdite çdo ditë, deri në zgjedhjen e Papës së 267-të.