Ndërkohë që politika po përgatitet për zgjedhjet e parakohshme në gjashtë bashki, edhe drejtësia pritet të kalojë në një proces vendimtar: zgjedhjen e kreut të ri të SPAK, meqë në dhjetor përfundon mandati i drejtuesit aktual, Altin Dumani.
Gazetarja e Top Channel, Anila Hoxha, e ftuar në studion e emisionit Top Story, zbuloi se gara për drejtimin e SPAK ka nisur të rrisë tensionet edhe brenda vetë Këshillit të Lartë të Prokurorisë. Ajo rrëfeu se një ditë më parë, gjatë një mbledhjeje mes kryetares së KLP-së, Mirela Bogdani, dhe tre anëtarëve të Komisionit të Karrierës, ka shpërthyer një debat i ashpër verbal.
Shkak për përplasjen u bë mënyra e administrimit të platformave që do të dorëzojnë kandidatët për kreun e SPAK. Një prej anëtarëve të komisionit kërkoi që të kishte vetëm ai akses në dokumentet që vijnë me e-mail, duke përjashtuar kolegët e tij. Kjo kërkesë solli kundërshtime të forta nga anëtarët e tjerë dhe tensioni përfundoi me tone të larta e dhunë verbale përballë kryetares së KLP-së.
“Takimi i zonjës Nancy VanHorn, e Ngarkuara me Punë e SHBA-së, me kryetaren Bogdani nuk ishte thjesht për mbështetje dhe kërkesë llogarie, por edhe për të vendosur ‘shinat’ për mënyrën se si do të ecë gara, përpara se të dalin emrat e kandidatëve publikisht,” tha Hoxha, duke shtuar se kjo përplasje tregon se beteja për drejtimin e SPAK ka hyrë në një fazë të ndjeshme dhe pritet të ashpërsohet më tej.