Presidenti ukrainas, Volodymyr Zelensky, reagoi fuqishëm ndaj raporteve se ai ishte ftuar në Moskë nga presidenti rus, Vladimir Putin, duke e konsideruar një takim të tillë “të pamundur”.
Zelensky theksoi se është i gatshëm për çdo format samiti me liderë, por refuzon kategorikisht një takim në Moskë ose në Bjellorusi, vend që ka lidhje të forta me Kremlinin.
“Takimi me Putinin në Moskë është i pamundur. Do të ishte njësoj si të takohesha me të në Kiev,” tha ai, duke shtuar me sfidë: “Madje mund ta ftoj në Kiev – le të vijë. Po e ftoj publikisht, nëse guxon.”
Presidenti ukrainas gjithashtu kritikoi udhëheqësit evropianë, duke i akuzuar për boshllëqe në mbrojtjen ajrore që Rusia i shfrytëzoi për të ndërprerë furnizimin me energji elektrike në Ukrainë, në dy javët e fundit.