Pesë vite pas vdekjes së kushërirës së saj të afërt, Elizabeth Anson, një rrëfim i ri hedh dritë mbi mendimin e sinqertë që Mbretëresha Elizabeth II kishte për Meghan Markle, pak para dasmës mbretërore me Princin Harry në vitin 2018.
Elizabeth Anson, e ndarë nga jeta në moshën 79-vjeçare, ishte një figurë e njohur në rrethet elitare britanike dhe një organizatore e shquar eventesh për familjen mbretërore, por ajo ishte edhe njëra nga njerëzit më të besuar të vetë Mbretëreshës. Marrëdhënia mes tyre ishte ndërtuar mbi sinqeritetin dhe besimin absolut.
Sipas biografes së njohur amerikane Sally Bedell Smith, e cila shkruan për revistën “Time”, Mbretëresha kishte ndarë në privat mendimet e saj të rezervuara për Meghan me kushërirën Anson, vetëm disa javë para martesës së bujshme. Ndryshe nga Anson, e cila kishte krijuar përshtypje pozitive për Meghan – duke e cilësuar atë si “të thjeshtë, inteligjente dhe me ndjenja përgjegjësie” – Mbretëresha dukej mjaft skeptike.
Sipas burimeve të cituara në artikull, Mbretëresha kishte shprehur dyshime serioze mbi ndjenjat e vërteta të Meghan ndaj Harryt, duke thënë:
“Ne kemi arritur në përfundimin se gjithçka varet nga ai, nëse ai e pëlqen. Harry është i çmendur pas grave, është i dobët ndaj tyre. Shpresojmë që ajo ta dojë vërtet, por nuk e besojmë. Ne mendojmë se ajo e orkestroi të gjithën.”
Kjo deklaratë e pazakontë për një monarke që rrallëherë shprehej hapur për çështje personale, është një tjetër copëz që shton misterin dhe tensionin përreth marrëdhënieve brenda familjes mbretërore.
Në vitet që pasuan largimin e Princit Harry dhe Meghan Markle nga detyrat mbretërore dhe zhvendosjen e tyre në SHBA, marrëdhëniet e çiftit Sussex me pjesën tjetër të familjes kanë qenë shpesh të tensionuara dhe të mbushura me polemika. Kjo rrëfenjë e re duket se përforcon pikëpamjet se mosmarrëveshjet kishin rrënjë më të hershme nga sa ishte bërë publike.