Pas shpalljes së vendimit që rrëzoi taksimin për “Profesionistët e Lirë,” deputetja demokrate Jorida Tabaku, e cila kishte dërguar këtë çështje në Gjykatën Kushtetuese, ka reaguar në rrjetet sociale.
Tabaku ka theksuar se ky vendim është një dëshmi e fuqisë së bashkimit dhe se kur njerëzit bashkohen, ata mund të realizojnë edhe të pamundurën.
Kjo deklaratë e saj thekson përpjekjet e përbashkëta dhe ndikimin pozitiv të mobilizimit të shoqërisë në ndihmën e vendimeve të rëndësishme.
“Ne mund të bëjmë më shumë, shkruan Tabaku në faqen e saj në rrjetet sociale, ndërsa thekson se “ne mund të rrëzojmë këtë sistem të padrejtë për një sistem taksimi të ndershëm dhe që promovon dijen, punën dhe shpirtin sipërmarrës”.
“Ne mund të fitojmë shumë. Shtresa e mesme sot është shtresa më e mbitaksuar në Shqipëri , është shtresa që punon më shumë dhe tatohet më shumë dhe që paguan gjithnjë, drejtësisht taksat dhe për këtë arsye ato mbingarkohen.
Sot 95% e shqiptarëve paguan taksa më të larta dhe më shumë se të gjitha mbingarkohet ajo shtresë që prodhon mendimin.
Ne duhet të jemi në mbështetje të punës, ne duhet të jemi në mbështetje të njerëzve të punës, ne duhet të jemi në mbështetje të njerëzve që kontribuojnë në ekonomi dhe në shoqëri e sa herë që bëhet fjalë për beteja të tilla unë do të jem me të gjithë profesionistët e lirë ashtu siç dhe grupi parlamentar ishte kësaj radhe.
Kësaj radhe vumë një tullë të vogël në sistemin e padrejtë të taksave, herës tjetër akoma më shumë. Kjo tregoi se kur jemi bashkë kemi fuqi dhe mund ta ndryshojmë këtë sistem”, shprehet Tabaku.