Yield-et e bonove 12-mujore shënuan përsëri një korrektim të lehtë në rritje në ankandin e kësaj jave, ndërsa pjesëmarrja e investitorëve ishte përsëri e ulët.
Sipas të dhënave nga Banka e Shqipërisë, yield-i mesatar i ponderuar arriti në 2.53%, nga 2.5% që kishte qenë në ankandin e fundit. Kjo ishte hera e parë që yield-et e bonove 12-mujore ngrihen mbi normë bazë të interesit, që prej tetorit të vitit të kaluar. Yield-i ngelet gjithashtu në rënie krahasuar me të njëjtën periudhë të vitit të kaluar, kur kishte qenë në nivelin 2.75% (po aq sa norma bazë e interesit në atë periudhë).
Megjithatë, rritja e yield-eve ngelet ende e vogël, sidomos po të kemi parasysh hendekun që është krijuar në ankandet e fundit mes kërkesës dhe ofertës. Nga 7.4 miliardë lekë që kishte qenë shuma e shpallur për financim nga Ministria e Financave, vlera totale e kërkesave në ankand ishte vetëm 4 miliardë lekë.
Rritja e lehtë e yield-eve në ankandet e fundit duket se i detyrohet kryesisht uljes së kërkesës nga investitorët. Fillimisht, kjo mund të shpjegohej me uljen e fortë të yield-eve, ndërsa gjatë muajit mars një ndikim të ndjeshëm besohet se ka pasur pritshmëria e fortë për një rritje të normave të interesit në vazhdim.
Pas sulmit të SHBA dhe Izraelit ndaj Iranit, konflikti në Lindjen e Mesme ka sjellë rritje të fortë të çmimeve të naftës dhe nënprodukteve të saj. Kjo është përkthyer, rrjedhimisht, në rritje të pritjeve inflacioniste, për shkak të efektit që shtrenjtimi i produkteve energjetike do të sjellë në zinxhirin e prodhimit të mallrave dhe shërbimeve.
Për momentin, bankat qendrore nuk kanë reaguar me rritje të normave të interesit, edhe duke shpresuar në një zgjidhje të shpejtë të konfliktit. Por, duke qenë se një zgjidhje e shpejtë nuk duket në horizont, një rritje e inflacionit gjatë muajve të ardhshme duket e pashmangshme. Kjo do të pasohet edhe nga rritja e normave të interesit. Me sa duket, investitorët po përfshihen nga një pritshmëri e tillë, siç ndodhi edhe në vitin 2022. Kjo duket se ka shkaktuar rënie të pjesëmarrjes në ankandet e javëve të fundit të instrumenteve të borxhit të qeverisë shqiptare.
Ndërkohë që deri muajin e kaluar yield-et e titujve qeveritarë vazhdonin rënien dhe pritshmëritë për një rritje të mundshme ishin të dobëta, tensionet gjeopolitike, edhe njëherë, duket se po shkaktojnë një ndryshim radikal në skenarët e pritshëm të ekonomisë dhe tregjeve financiare./MONITOR