Stenaldo ka ndarë disa muaj më parë brenda shtëpisë së Big Brother VIP 5 historinë e tij të jetës, e cila nis me një tragjedi të rëndë familjare. Ai tregoi se babai i tij u vra kur ai ishte vetëm një muajsh, në një ngjarje që e ka shoqëruar gjatë gjithë jetës.
Sipas rrëfimit të tij, babai u ekzekutua në mënyrë të pabesë nga një person që pak çaste më parë e kishte përqafuar, e më pas e qëlloi pasi ai i ktheu shpinën për t’u larguar. Stenaldo theksoi se kjo ngjarje ka ndikuar thellë në mënyrën si ai e sheh jetën, duke u shprehur se humbje të tilla nuk “mësohen”, por thjesht bëhen pjesë e qenies së njeriut që në fillim.
“Unë kam lindur në Lushnje në 28 maj të 1997. Kam lindur në një qytet ku nuk kam jetuar kurrë, hiq muajin e parë të jetës time, derisa im atë në qershor të po atij viti ndërroi jetë, i vrarë në një mënyrë të poshtër në atë vit të poshtër për të gjithë shqiptarët që na ka bërë të humbasim më shumë se çdo herë në historinë tonë të brishtë. U vra nga dikush mbasi atij i dha një përqafim dhe i ktheu kurrizin për të vazhduar rrugën e tij. Dhe kjo është arsyeja pse unë gjithmonë kam thënë që në këtë botë të gjithë trimat vriten nga frikacakët. Kur njeriu rritet me një humbje të tillë nuk ka me asnjë moment dramatik në jetën e tij, nuk ka një moment kur ti e mëson, ti thjesht e di që ndryshe nga fëmijët e tjerë babai jot nuk është aty”, tha ndër të tjera në rrëfimin e tij Stenaldo.
Së fundmi, zhvillime të reja lidhen me këtë histori. Në Itali janë arrestuar dy xhaxhallarët e tij, Artur dhe Arben Mëhilli, të cilët në vitin 1999 vranë personin që konsiderohej përgjegjës për vrasjen e vëllait të tyre, Rezar Metajn.
Ata ishin dënuar nga Gjykata e Lushnjës në vitin 2001 për vrasje me paramendim në bashkëpunim, si dhe për armëmbajtje pa leje, me dënime përkatësisht 15 vite e 6 muaj dhe 16 vite e 6 muaj burg. Pas krimit, ata u arratisën drejt Italisë duke përdorur identitete të rreme, me të cilat arritën të siguronin edhe leje qëndrimi.