Wayne Rooney ka reaguar me tone të forta ndaj vendimit të FIFA-s për të pezulluar për një vit zbatimin e dënimit me një ndeshje skualifikim të Folarin Balogun, pas kartonit të kuq që sulmuesi mori në përballjen mes SHBA-së dhe Bosnjës.
Ish-kapiteni i Anglisë e cilësoi vendimin si të papranueshëm, duke drejtuar kritika të drejtpërdrejta ndaj presidentit të FIFA-s, Gianni Infantino. Sipas raportimeve, vendimi është marrë pas ndërhyrjeve të ardhura nga Shtëpia e Bardhë.
“Besoj se është një turp i vërtetë. Më shqetësuese është fakti që pezullimi i dënimit është shtyrë për një vit. Infantinos duhet t’i vijë turp, sepse ky vendim bie ndesh me frymën e sportit dhe me parimet e lojës së ndershme”, u shpreh Rooney.
Ai solli në vëmendje edhe përvojën e tij personale në Euro 2012, kur u ndëshkua me tre ndeshje pezullim, duke theksuar se nëse FIFA vlerësonte se Balogun nuk e meritonte kartonin e kuq, atëherë duhej të rishikonte ose anulonte dënimin, jo ta pezullonte zbatimin e tij për 12 muaj.
Në anën tjetër, Zlatan Ibrahimović dhe Thierry Henry, të cilët janë pjesë e ekipit të analizës së Fox Sports për Botërorin, kanë mbështetur vendimin e FIFA-s. Sipas tyre, Balogun nuk e meritonte kartonin e kuq në ndeshjen ndaj Bosnjës, ndaj e konsiderojnë të drejtë mënyrën se si u trajtua çështja.