Presidenti i Serbisë, Aleksandar Vuçiç, ka konfirmuar pjesëmarrjen në Paradën e Fitores më 9 maj në Moskë, duke deklaruar se do të udhëtojë së bashku me një njësi të Ushtrisë serbe. Pavarësisht paralajmërimeve të forta nga zyrtarët evropianë për pasojat e kësaj vizite, Vuçiç tha se nuk ka asgjë për të fshehur dhe se vendimi i tij është bërë publik prej muajsh.
“Kam paralajmëruar që tetë muaj më parë se do të shkoj në Moskë. Nuk kam qenë atje që nga nëntori i vitit 2021 dhe nuk kam asgjë për të fshehur. Ne jemi krenarë për kontributin në luftën kundër fashizmit dhe kjo është arsyeja pse kam pranuar ftesën për të marrë pjesë në 80-vjetorin e fitores,” u shpreh Vuçiq për mediat serbe.
Ai shtoi gjithashtu se pas Moskës pritet të zhvillojë një sërë takimesh diplomatike në SHBA dhe Evropë, përfshirë samitet në Sevilla, Tiranë dhe Romë. Në agjendë pritet të diskutohet edhe për marrëveshjen e re të gazit me Rusinë.
Ndërkohë, shefja e politikës së jashtme të BE-së, Kaja Kallas, ka paralajmëruar se pjesëmarrja në këtë ngjarje të organizuar nga presidenti rus Vladimir Putin mund të ketë pasoja për vendet pjesëmarrëse.