Detaje të reja kanë dalë në dritë lidhur me vrasjen e ndodhur mesditën e kësaj të dite në Paskuqan, ku humbi jetën 27-vjeçari Ardian Baloshi pas një sulmi me armë zjarri.
Sipas informacioneve paraprake nga hetimet, në vendngjarje janë sekuestruar 10 gëzhoja, çka tregon se ndaj viktimës është qëlluar disa herë. Burime pranë grupit hetimor bëjnë me dije se autori dyshohet të ketë tentuar të ekzekutojë edhe një person tjetër që ndodhej në vendin e ngjarjes, por ky i fundit ka arritur t’i shpëtojë të shtënave.
Si autor i dyshuar i krimit është identifikuar Sadik Llanaj, i cili vijon të jetë në arrati. Policia e konsideron atë person me rrezikshmëri të lartë, pasi dyshohet se ende mban me vete armën e përdorur në ngjarje.
Sipas të dhënave paraprake, plumbat kanë goditur 27-vjeçarin në pjesën e kokës, duke i shkaktuar plagë fatale.
Ndërkohë, Policia e Tiranës ka intensifikuar kërkimet për kapjen e të dyshuarit dhe u ka bërë thirrje qytetarëve të bashkëpunojnë me autoritetet. Për çdo informacion të vlefshëm që mund të çojë në lokalizimin dhe arrestimin e autorit, policia ka vendosur një shpërblim prej 10 mijë eurosh.
Hetimet vijojnë për zbardhjen e plotë të rrethanave dhe motiveve që çuan në këtë ngjarje të rëndë kriminale.