Sot del para Gjykatës, Darmen Keli, i cili dyshohet si autor i vrasjes së Amarlido Hoxhallarit. Ai do të marrë vlerësimin e masës së sigurisë pas ngjarjes së rëndë të ndodhur të shtunën e kaluar në zonën e Astirit në Tiranë.
Pritet që Gjykata të konsiderojë të drejtë arrestin e Kelit dhe t’i caktojë masën e “arrestit me burg”.
Darmen Keli para grupit hetimor ka dëshmuar se motivi që çoi në ngjarjen e rëndë ka qenë ngacmimi që Hoxhallari i ka bërë të fejuarës.
“Përcolla të fejuarën për tek parkimi dhe u ngjita për në shtëpi. Kur dola në ballkon pashë që një motor po e ndiqte dhe fliste duke e ndjekur paralel në makinë. I fola nga ballkoni më pas zbrita. Aty Amarildo Hoxhallari më ofendoi dhe më goditi. Pas përplasjes në një moment e godita me thikën që e kisha marrë nga shtëpia”, ka dëshmuar ai.
Hoxhallari më pas është larguar nga vendi i ngjarjes me një shokun e tij që drejtonte motorin. Por pak metra më pas ka rënë nga motori për shkak të plagëve. Policia ka arrestuar dhe shokun e tij drejtuesin e motorit për ‘Drejtim mjeti në gjendje të dehur’ pasi nga testi alkoolit ka rezultuat i pirë.