TIRANË– Gjykata e Tiranës ka caktuar masën e sigurisë “arest me burg” për Darment Kelin, shtetasi i cili të premten e 24 Gushtit vrau me thikë 34-vjeçarin Amarildo Hoxhallari.
Bazuar në hetimet e policisë dhe dëshmive të dhëna, mësohet se konflikti mes viktimës dhe autorit ka nisur për motive të dobëta. Sikiurse ka rrëfyer Keli, arsyeja që e çoi në vrajse është ngacmimi që Hoxhallari i ka bërë të fejuarës së tij.
HETIMET
Grupi hetimor i ngritur posaçërisht për hetimin e ngjarjes së rëndë të ndodhur në “Astir” mbrëmjen e së shtunës, mësohet se nuk po heton vetëm pistën e vrasjes për motive të dobëta.
Burimet bëjnë me dije se po hetohen edhe shkaqe të tjera, pasi viktima ka qenë një emër i njohur për drejtësinë, ndonëse ai duket se nuk ka rezultuar të ishte fajtor apo i përfshirë në një mori ngjarjesh të ndodhura më herët.
Grupi hetimor po punon intensivisht për të mësuar nëse autori dhe viktima njiheshin më herët, apo nëse kanë pasur probleme të tjera, përveç atij momenti fatal që i mori jetën të riut.
DËSHMIA
“Përcolla të fejuarën për te parkimi dhe u ngjita për në shtëpi. Kur dola në ballkon, pashë që një motor po e ndiqte dhe personi po fliste duke e ndjekur paralel makinën. I fola nga ballkoni dhe më pas zbrita. Aty Amarildo Hoxhallari më ofendoi dhe më goditi fizikisht. Pas përplasjes me të, në një moment e godita me thikën që e kisha marrë nga shtëpia, në gjaknxehtësi dhe sipër. Ka qenë sherr i momentit dhe jo i paramenduar, nuk kam pasur qëllim vrasjen e tij.
Kujtojmë se në njoftimin zyrtar të ditës së djeshme, Policia e Tiranës ka sqaruar se viktima në momentin e konfliktit shoqërohej nga i ndaluari tjetër A.M., 33 vjeç, që e drejtonte motorin e tij në gjendje të dehur. Ai është ndaluar për “drejtim mjeti në mënyrë të parregullt”, kurse hetimet për krimin e rëndë mbeten ende aktive.