Janë zbardhur detajet e krimit të rëndë familjar që tronditi fshatin Shkallnur të Durrësit, ku një 25-vjeçar vrau babain e tij me një thikë kuzhine, pas një konflikti në banesë.
Sipas hetimeve paraprake, i riu me iniciale M.K. ka sulmuar fillimisht të atin, 69-vjeçarin P.K., duke e goditur me dru në kokë, e më pas ka marrë një thikë dhe e ka goditur në zemër, plagë që i mori jetën në vend.
Pas ngjarjes, autori u largua nga shtëpia, ndërsa Forcat “Shqiponja” nisën menjëherë kërkimet. Ai u lokalizua dhe arrestua pas rreth dy orësh në lagjen nr.13 të Durrësit.
Sipas policisë, gjatë kontrollit, i është gjetur dhe sekuestruar thika e përdorur për kryerjen e krimit. Mësohet gjithashtu se 25-vjeçari dyshohet të ketë probleme të shëndetit mendor.
Materialet hetimore i janë referuar Prokurorisë së Durrësit për veprime të mëtejshme procedurale.