Gjykata e Durrësit ka vendosur masat e sigurisë “detyrim paraqitjeje” dhe “ndalim daljeje jashtë shtetit” për katër personat e arrestuar në lidhje me vrasjen e Flori Paluçit.
Në pranga janë Erald Cani, Ergi Kadiu dhe vëllezërit Taulant dhe Emirjan Beqja, të cilët akuzohen për moskallëzim krimi.
Ndërkohë, në kërkim vijon të jetë Daniel Pepa, i dyshuar si autor i ekzekutimit të Paluçit.
Sipas hetimeve, ngjarja nisi pas një konflikti verbal brenda një lokali në Durrës, mes Pepës, kamerierit të lokalit dhe vetë viktimës Flori Paluçi, që ndodhej aty me disa miq.
Pas debatit, Pepa është larguar, por është rikthyer pak më vonë, i shoqëruar nga Ergi Kadiu dhe Aranit Kurti.
Në momentin që tentuan të hynin në lokal, Flori Paluçi ka dalë jashtë dhe ka qëlluar fillimisht në tokë me armë zjarri.
Menjëherë pas kësaj, Daniel Pepa dyshohet se ka hapur zjarr në drejtim të Paluçit, duke e plagosur rëndë, ndërsa ky i fundit ka qëlluar përsëri në drejtim të Pepës dhe Kurtit.
Nga përplasja me armë, kanë mbetur të vrarë Flori Paluçi dhe Aranit Kurti.
Hetimet kanë zbuluar se menjëherë pas ngjarjes, Daniel Pepa është larguar nga vendi i krimit me një tjetër person, të identifikuar si G.A., i cili gjithashtu është shpallur në kërkim.
Policia po vijon kërkimet intensive për kapjen e autorëve të dyshuar.