Prokuroria e Posaçme po heton pistën e përfshirjes së një grupi kriminal në vrasjen e Elis Roshkodolit, ngjarje e ndodhur një vit më parë në Shkodër. Dyshohet se vrasja mund të jetë porositur si hakmarrje për konflikte të ndodhura jashtë Shqipërisë, pasi viktima ishte kthyer prej një viti nga Belgjika.
Aktualisht, në burg ndodhen Voltan Xhani dhe kushëriri i tij që punonte në një servis të marrë me qira, ndërsa në kërkim vijon të jetë Dritan Milani, i lidhur me një tjetër atentat të dështuar, ku mbeti i plagosur vëllai i tij, Olger Stolaj.
Sipas Prokurorisë, Elis Roshkodoli u qëllua për vdekje ndërsa po pinte kafe me një shok, nga një person i maskuar me maskë COVID. Autori mbërriti me një automjet me targa të vjedhura në Mal të Zi, të cilat më pas u zëvendësuan me targa të tjera, të shpallura të humbura nga një shtetas gjerman – ky i fundit nën hetim për mashtrime në vendin e tij.
Pamjet e sigurisë të analizuara nga dhjetëra kamera tregojnë për një mjet që e priste autorin e vrasjes me dyer të hapura, çka sugjeron praninë e të paktën dy bashkëpunëtorëve në vendngjarje.
Dëshmitarë të shumtë kanë deklaruar se viktima kishte planifikuar të largohej sërish jashtë vendit. Një prej tyre tha se Roshkodoli i kishte shitur makinën, duke i treguar për planet për t’u larguar. Edhe e ëma e tij konfirmoi se djali po përgatitej të rinovonte pasaportën dhe se shoqëria e tij përfshinte persona nga Shkodra, Elbasani dhe Korça.
“Djali im i vetëm, kishte humbur të atin dhe të vëllanë, dhe nuk më kishte shprehur ndonjë shqetësim. Po bënte pasaportën sepse donte të ikte”, deklaroi nëna e viktimës, e cila i ka dorëzuar Prokurorisë edhe numrat e telefonit të personave me të cilët Roshkodoli shoqërohej.
Hetimet për vrasjen vijojnë nën drejtimin e SPAK, në bashkëpunim me Policinë e Shtetit, ndërsa mbetet ende e hapur pista e porositësve dhe motiveve përfundimtare të ngjarjes.