Policia e Fierit ka ndaluar një person të dytë në lidhje me ngjarjen e rëndë në fshatin Frashër, ku 26-vjeçarja Emanilda Rama vrau babanë e saj për motive ende të paqarta.
I arrestuari është Çlirim Dogani, 55 vjeç, banues në Arapaj të Roskovecit. Hetimet e deritanishme dyshojnë se ai ka bashkëpunuar me të renë në krim, duke marrë pjesë në mbytjen e viktimës me tel dhe në goditjen e tij me sende të forta dhe mjete prerëse.
Materialet i janë referuar Prokurorisë së Fierit për veprime të mëtejshme, ndërsa hetimet vazhdojnë për zbardhjen e plotë të ngjarjes dhe motiveve që çuan në këtë krim tronditës.