Disa detaje të reja kanë dalë nga hetimet për vrasjen e Ramazan Matajt, ngjarje e ndodhur më 5 janar në Postribë të Shkodrës, për të cilën janë arrestuar dy vëllezërit Arjon dhe Klisman Hasaj. Arjon akuzohet si organizator dhe ekzekutor, ndërsa Klisman si bashkëpunëtor.
Dosja e mbërritur në gjykatën e Shkodrës tregon se Arjon Hasaj, autori kryesor, përdori një profil mashtrues në Instagram, duke u paraqitur si femër, për të organizuar takimin me viktimën. Ai ka pranuar vetë autorësinë e krimit dhe ka deklaruar se pagoi një vajzë rome për t’i dërguar dy mesazhe zanore Matajt, duke e bindur se po fliste me një femër.
Sipas rrëfimit të Hasajt, motiv për vrasjen u bënë tensionet familjare: viktima ishte akuzuar për marrëdhënie seksuale dhe shpërndarje të fotove dhe videove intime, si dhe si shkaktari i dy divorceve të motrës së autorit, Armela Hasaj, me të cilën kishte lidhje prej vitesh.
Arjoni ka deklaruar gjithashtu se 2-3 netë përpara ngjarjes kishte parë një video të motrës së tij në Instagram, ku identifikoi makinën e Ramazan Matajt, gjë që e rëndoi psikologjikisht. Në natën e ngjarjes, pasi viktima mbërriti me makinë, Arjoni qëlloi 18-19 herë me një pushkë 20-she dhe më pas u largua me biçikletë, duke fshehur armën pas shtëpisë. Ai pranoi se askush nuk e kishte ndihmuar dhe se kishte qenë i rënduar psikologjikisht, ndërsa shprehu pendesë për krimin.
Pas arrestimit të dy të pandehurve, përgjimet e kryera në komisariat zbuluan se ata fillimisht kishin rënë dakord të mohueshin, por pas sekuestrimit të armës dhe municionit, Arjoni pranoi vrasjen. Ai u arrestua në Muriqan duke tentuar të kalonte në Malin e Zi menjëherë pas krimit.
Motra e autorëve, Armela Hasaj, ka deklaruar se që nga viti 2018 kishte një lidhje me Ramazan Mataj dhe se shpesh ishte kanosur nga ai, duke bërë kallëzime dhe duke marrë urdhër mbrojtjeje nga gjykata. Ajo tha se Mataj e përndiqte, duke i shkruar nga adresa fallco dhe shpërndarë materiale intime.
Babai i viktimës, Fatmir Mataj, tregoi se djali i tij i kishte thënë se do të takonte një vajzë nga fshati Drisht, por mesazhet dhe telefonatat e tij gjatë natës nuk morën përgjigje, dhe mëngjesi i gjeti lajmin e vrasjes përmes mediave. Babai i dy autorëve, Rrustem Hasaj, deklaroi se nuk kishte dijeni për krimin, profilin mashtrues në Instagram apo armët e fshehura.
Prokuroria thekson se janë siguruar prova materiale, përfshirë armën, municionin dhe gëzhojat, dhe çështja do të vazhdojë në gjykatë. Hetimet dhe dëshmitë e familjarëve dhe dëshmitarëve të tjerë mbeten pjesë e procesit gjyqësor.