Një 19-vjeçare shqiptare, e identifikuar si Myrto, u gjet e pajetë në një park në Greqi, ndërsa mediat greke kanë zbardhur detaje të reja mbi momentet e fundit para vdekjes së saj dhe mënyrën si ajo u braktis nga tre të arrestuarit.
Sipas hetimeve dhe pamjeve të siguruara nga policia greke (ELAS), si dhe dëshmisë së një prej të ndaluarve, e reja kishte konsumuar kokainë në një apartament Airbnb ku ndodhej me të arrestuarit. Pas përkeqësimit të gjendjes së saj shëndetësore, në vend që të njoftonin shërbimet e emergjencës, të dyshuarit dyshohet se kanë vendosur ta largonin nga vendi i ngjarjes.
Në dëshmi për autoritetet, njëri prej të arrestuarve ka pranuar se situata doli jashtë kontrollit pas përdorimit të lëndëve narkotike, ndërsa ka treguar se fillimisht ishte menduar thirrja e ambulancës, por më pas kjo ide është kundërshtuar nga dy të tjerët.
Sipas tij, ata kanë vendosur ta nxirrnin vajzën nga apartamenti dhe ta linin në një shesh publik, duke u justifikuar se “do të thoshin se e kishin gjetur në rrugë”. Në pamjet filmike, viktima shihet duke u transportuar pa ndjenja nga një prej të arrestuarve.
Mësohet se njëri prej tyre është kthyer më pas në ambientet e akomodimit për të pastruar gjurmët dhe për të zhdukur provat, ndërsa telefoni i viktimës dyshohet se është marrë dhe fshehur në një dyqan.
Kur ambulanca mbërriti në vendngjarje në orët e para të mëngjesit, 19-vjeçarja u gjet pa shenja jete dhe pa lëndime të jashtme të dukshme, ndërsa autorët fillimisht tentuan të paraqiteshin si kalimtarë të rastësishëm.
Njëri prej të arrestuarve ka deklaruar se vajza kishte kërkuar vetë të konsumonte kokainë dhe se droga ishte siguruar përmes një personi të tretë, i cili gjithashtu është marrë në pyetje nga autoritetet.
Ai ka shtuar se gjendja e saj u përkeqësua papritur dhe se ata nuk e kuptuan seriozitetin e situatës, por prokuroria greke thekson se veprimet e tyre pas incidentit – braktisja dhe fshehja e gjurmëve – janë elementë që rëndojnë akuzën.
Tre të arrestuarit përballen me akuza të rënda, përfshirë vrasje me dashje me mosveprim, si dhe posedim dhe përdorim të lëndëve narkotike, ndërsa hetimet vijojnë për të sqaruar plotësisht rolin e secilit në ngjarje.