Komisioneri Shtetëror i Zgjedhjeve, Ilirjan Celibashi, njoftoi sot se kanë mbërritur 735 zarfe me votat e para nga diaspora, të cilat po administrohen nga KQZ në ambientet e Parkut Olimpik në Tiranë.
Sipas tij, procesi po zhvillohet sipas parashikimeve dhe nën mbikëqyrje të vazhdueshme. “Zarfi i parë erdhi nga Gjermania për qarkun Berat dhe i dyti nga Franca për qarkun Dibër. Të dy janë të rregullt nga çdo pikëpamje”, deklaroi Celibashi.
Ai sqaroi edhe procedurat e administrimit të votave, ku çdo zarf kalon përmes një procesi të strukturuar për të ruajtur fshehtësinë e votës. Zarfet do të ruhen deri më 11 maj, kur të nisë numërimi.
Ambienti ku ruhen kutitë monitorohet 24/7 me kamera sigurie dhe pamjet transmetohen në kanalet zyrtare të KQZ-së në YouTube. “Çdokush që ka interes mund ta ndjekë procesin në kohë reale”, theksoi Celibashi.
Ai u ndal edhe te shpërndarja e fletëve të votimit, duke thënë se Shkodra dhe Vlora janë dy qarqet e vetme ku ende nuk ka nisur procesi, ndërsa në total rreth 80 mijë votues nga jashtë e kanë marrë zarfin.
Sa i përket shqetësimeve për operatorin postar, Celibashi sqaroi se marrëveshja është me DHL, por në disa rajone përdoren edhe nënkontraktorë për shkak të mbulimit të kufizuar të shërbimit. Në shtete si Rusia dhe Irani, për shkak të sanksioneve, shpërndarja kryhet nga kompani lokale.
Ai theksoi se çdo votë që mbërrin pas orës 19:00 të datës 11 maj nuk do të merret në konsideratë për numërim.