Situata e përmbytjeve është përkeqësuar në jug të vendit, pasi lumi Vjosa ka dalë nga shtrati duke përmbytur zona të tëra në Njësinë Administrative Novoselë.
Nënkalimi poshtë autostradës Vlorë–Fier, i cili lidh disa fshatra të zonës, është bllokuar totalisht nga uji. Sipas raportimeve, niveli i ujit ka arritur rreth 1.5 metra, duke e bërë të pamundur kalimin e automjeteve.
Si pasojë, janë izoluar të paktën 6 fshatra, ndërsa qarkullimi i mjeteve është ndërprerë edhe në segmente të autostradës Vlorë–Levan.
Uji i Vjosës ka depërtuar edhe në trupin e autostradës, duke rritur rrezikun për drejtuesit e mjeteve dhe banorët e zonës. Autoritetet ndodhen në terren dhe u bëjnë thirrje qytetarëve të shmangin lëvizjet në zonat e rrezikuara.