Një turiste spanjolle u shpëtua këtë pasdite në zonën e plazhit të Filikurit, Himarë, pasi u rrëzua dhe pësoi dëmtime në kokë. Ngjarja ndodhi rreth orës 16:00, kur Salla Operative e Policisë njoftoi patrullën për ndihmë të menjëhershme në një zonë të vështirë për akses.
Policia e Himarës mbërriti me shpejtësi në vendngjarje, ku bashkë me disa pushues të pranishëm, bënë të mundur nxjerrjen e saj nga terreni i vështirë ku ishte bllokuar dhe e shoqëruan me ambulancë në Qendrën Shëndetësore Himarë. Aktualisht, turistja ndodhet nën kujdesin e mjekëve dhe gjendja e saj është e qëndrueshme.
Policia falënderoi pushuesit që u solidarizuan me rastin dhe theksoi angazhimin e saj për t’u përgjigjur me profesionalizëm në çdo situatë emergjente, për sigurinë e qytetarëve dhe vizitorëve në bregdetin shqiptar.
Pamjet nga vendngjarja tregojnë momentin kur policët dhe pushuesit bashkëpunojnë për të shpëtuar turisten.