Një incident i frikshëm është regjistruar më 1 maj në një fabrikë në Kinë, ku një robot humanoid ka dalë jashtë kontrollit dhe ka sulmuar dy operatorë. Pamjet nga kamerat e sigurisë, të publikuara nga “Daily Mail”, tregojnë momentin kur roboti, i lidhur me një vinç të vogël, fillon të lëvizë në mënyrë agresive dhe të godasë dhunshëm.
Në video, shihet se ndërsa një operator punon në kompjuter, roboti papritmas fillon të lëvizë në mënyrë të çrregullt, duke ngritur krahët dhe përplasur gjithçka rreth tij. Njëri nga punëtorët përpiqet të mbulohet, ndërsa tjetri largohet me vrap nga frika. Situata përshkallëzohet kur ekrani i kompjuterit bie në tokë dhe sendet shpërndahen në ambient.
Një nga operatorët përpiqet me dëshpërim të ndalojë robotin duke tërhequr vinçin që e mban, ndërsa të pranishmit përreth largohen në panik.
Ngjarja ka shkaktuar një valë reagimesh në rrjetet sociale, ku shumë përdorues e kanë krahasuar me skena nga filma fantastiko-shkencorë, duke shtruar sërish pyetjen se sa të sigurt jemi përballë inteligjencës artificiale dhe teknologjisë gjithnjë e më të avancuar.