Janë publikuar pamjet e incidentit të ndodhur një ditë më parë në Ostren të Bulqizës, gjatë një takimi elektoral të Partisë Demokratike. Pamjet e siguruara nga kamerat e sigurisë tregojnë një përplasje fizike mes disa personave në ambientet e jashtme të lokalit ku mbahej takimi.
Ngjarja nis me një debat verbal mes dy personave, i cili shpejt kalon në përleshje fizike. Në konflikt më pas përfshihen edhe persona të tjerë, ndërsa disa përpiqen të ndalojnë sherrin.
Policia njoftoi sot se ka nisur procedimin penal ndaj drejtuesit politik të PD në Dibër, Xhelal Mziu, dhe nipit të tij, Elvis Mziu, për veprën penale “Kanosja apo dhunimi ndaj pjesëmarrësve në zgjedhje”. Sipas hetimeve paraprake, ata dyshohet se kanë sulmuar fizikisht Kalosh Murrën, 33 vjeç, punonjës në sektorin e ndihmës ekonomike në Bashkinë Bulqizë.
Nga ana tjetër, Xhelal Mziu ka mohuar akuzat dhe ka deklaruar se Murra po intimidonte pjesëmarrësit në takim me kërcënime për heqje të ndihmës ekonomike. Mziu pretendon se ngjarja ishte e inskenuar dhe e organizuar në bashkëpunim me përfaqësues të Partisë Socialiste. Policia po vijon hetimet për të sqaruar të gjitha rrethanat e ngjarjes.