Gjatë një takimi elektoral me qytetarët e Skraparit, Kryeministri Edi Rama premtoi ndërtimin e rrugës Berat-Skrapar nëse Partia Socialiste fiton një mandat të katërt qeverisës.
Rama deklaroi se rruga e re do të reduktojë ndjeshëm kohën e udhëtimit, duke e bërë të mundur përshkrimin e saj për vetëm 30 minuta. Ai theksoi se ky investim do të rrisë vlerën e tokave në zonë dhe do të nxisë rikthimin e emigrantëve në vendlindje.
Sipas tij, rruga do të shërbejë gjithashtu si një impuls për zhvillimin e turizmit, duke lidhur bukuritë natyrore të Beratit, Skraparit dhe Përmetit në një itinerar të përbashkët.
“Pavarësisht shiut që na detyroi të jemi në këtë ambient të mbyllur, besoj se është një ogur i mirë për mandatin e katërt”, tha Rama, duke shtuar se pritja e gjatë për këtë projekt më në fund do të marrë fund.