I dyshuari për vrasjen që ndodhi në orët e para të mëngjesit të së hënës në Gjakovë është vetëdorëzuar në polici, njoftoi drejtori i Policisë në Gjakovë, Lumni Graishta.
Ngjarja e rëndë ndodhi në Çarshia e Vjetër, në rrugën “Vëllezërit Frashëri”, ku gjatë të shtënave me armë zjarri një person 38-vjeçar mbeti i vrarë dhe një tjetër u plagos.
Sipas zëdhënësit të Policisë Rajonale në Gjakovë, Sheremet Elezaj, njësitet e policisë, së bashku me Prokurorin e Shtetit dhe ekipet mjekësore, dolën menjëherë në vendngjarje. Ekipet konstatuan vdekjen e viktimës në vendin e ngjarjes dhe trupi i pajetë u dërgua për ekzaminim mjeko-ligjor.
“Rreth orës 5:30 kemi pranuar informacionin se në rrugën ‘Vëllezërit Frashëri’ dy meshkuj të moshës madhore janë qëlluar me armë zjarri. Si pasojë e plagëve njëri prej tyre ka ndërruar jetë në vendngjarje,” tha Elezaj, duke shtuar se është inicuar rasti si “vrasje e rëndë” dhe hetimet vijojnë.