Nga e hëna, monopatinat elektrike nuk do të lejohen të qarkullojnë në rrugët e Shqipërisë. Vendimi u bë publik nga ministrja e Brendshme, Albana Koçiu, e cila njoftoi nisjen e një operacioni kombëtar për ndalimin e përdorimit të këtyre mjeteve, deri në hartimin e një kuadri të plotë rregullator.
Sipas Koçiut, vendimi vjen pas një numri në rritje ankesash nga qytetarët për rrezikshmërinë që paraqesin monopatinat, sidomos për të miturit, të moshuarit dhe vetë përdoruesit.
“Policia e Shtetit është urdhëruar të mos lejojë përkohësisht qarkullimin e monopatinave elektrike në rrugë. Ky ndalim do të qëndrojë në fuqi deri në përcaktimin e rregullave të qarta për përdorimin e tyre — nga moshat e lejuara e deri te pajisjet mbrojtëse dhe shpejtësia maksimale”, deklaroi ministrja.
Koçiu sqaroi gjithashtu se aktivitetet tregtare për dhënien me qira të monopatinave nuk do të lejohen, ndërsa përdorimi i tyre në të ardhmen do të kufizohet vetëm për qëllime vetjake.
Ajo shtoi se masa të ngjashme janë marrë edhe në vende të tjera europiane, si Franca, Italia, Gjermania dhe Maqedonia e Veriut, duke nënvizuar se Shqipëria do të mbështetet në praktikat më të mira evropiane për të garantuar sigurinë publike.