TIRANË– Kisha Orthodhokse e Shqipërisë ka reaguar lidhur mbi ndarjen nga jeta të Papa Françeskut në moshën 88-vjeçare.
Në deklaratën zyrtare Kisha Orthodhokse shpreh ngushëllimin besimtarëve të Kishës Romano-Katolike. Më tej theksohet përpjekja e Papa Françeskut për mirëkuptim mes kishave. Gjithashtu, përmendet edhe fjala e Papës “ecni si vëllezër”.
Reagimi i KOASH:
Mbi fjetjen e Papa Françeskut
Duke marrë pjesë në hidhërimin për fjetjen e Papës së Romës, Françeskut, dëshirojmë të shprehim ngushëllimet tona ndaj klerit dhe besimtarëve të Kishës Romano-Katolike. Gjatë misionit të tij si prift, peshkop dhe Papë, ai gjithmonë tregoi një përkushtim të thellë ndaj shpalljes së Ungjillit në kontekste të ndryshme gjeografike dhe kulturore, veçanërisht përmes kujdesit të tij të sinqertë për të varfërit dhe të margjinalizuarit. Veçanërisht vlerësojmë përpjekjet e tij të sinqerta për të nxitur një mirëkuptim më të madh ndërmjet Kishës Orthodhokse dhe asaj Katolike. Sjellim ndër mend fjalët e tij gjatë takimeve me përfaqësuesit e Kishës Orthodhokse: “Ecim së bashku si vëllezër në rrugën e mëshirës dhe të dashurisë”. Me shpresën tek Krishti i Ngjallur i Cili: “…do të fshijë çdo lot nga sytë e tyre dhe nuk do të ketë më as vdekje, as zi, as vajtim, as dhimbje, sepse bota e mëparshme mori fund” (Zb. 21:4), lutemi që Zoti ynë, Ati i mëshirshëm, t’i japë prehje shpirtit të tij. I përjetshëm kujtimi!/Radar.al
 
Jeta e Papa Françeskut: Një epokë reformash dhe polemikash brenda Kishës