Për shkak të temperaturave të larta që pritet të kapin deri në 36°C gjatë datave 3–10 korrik, Ministria e Shëndetësisë së Kosovës ka publikuar një plan masash për mbrojtjen e punëtorëve dhe grupeve të ndjeshme të popullsisë.
Në koordinim me Institutin Kombëtar të Shëndetësisë Publike, ministria rekomandon që institucionet publike dhe private të përshtatin oraret e punës, përmes orarit fleksibël, fillimit më të hershëm të punës në mëngjes ose punës nga shtëpia kur është e mundur.
Në fokus të veçantë janë gratë shtatzëna, personat me sëmundje kronike, të moshuarit, fëmijët dhe punonjësit që punojnë në ambiente të hapura. Për këta grupe, ministria rekomandon lehtësime të veçanta gjatë orëve të pikut të nxehtësisë.
Gjithashtu, theksohet nevoja për ajrosje të mjaftueshme në ambientet e mbyllura të punës, vendosjen e pikave freskuese në hapësirat e jashtme dhe sigurimin e ujit të ftohtë për punonjësit.
Ministria i bën thirrje të gjitha institucioneve që të zbatojnë masat për të garantuar sigurinë dhe mirëqenien gjatë kësaj vale të nxehti që ka përfshirë rajonin.