Një marshim madhështor mbarëkombëtar po zhvillohet sot në Tiranë në mbështetje të ish-krerëve të Ushtrisë Çlirimtare të Kosovës. Mijëra qytetarë nga Kosova dhe Lugina e Preshevës kanë mbërritur në kryeqytetin shqiptar, duke e kthyer këtë të premte në një ditë simbolike bashkimi kombëtar.
Qindra ish-luftëtarë të UÇK-së, të veshur me uniforma ushtarake dhe me emblemën karakteristike në krah, u nisën nga Kosova drejt Shqipërisë, ku në pikën kufitare u pritën me përshëndetje ushtarake. Drejtuesit e policisë së të dyja shteteve u dekoruan në shenjë mirënjohjeje, ndërsa kalimi u zhvillua në mënyrë solemne.
Krahas tyre, dhjetëra motoçiklistë veteranë udhëtuan drejt Tiranës, ndërsa mijëra qytetarë të tjerë morën rrugën me autobusë dhe automjete private, duke mbajtur flamuj kombëtarë dhe të UÇK-së, me thirrjen e vetme: “Liri për çlirimtarët!”
Në këtë lëvizje nuk mungoi as përfaqësimi nga Presheva, që iu bashkua kërkesës për ndalimin e, siç thuhet, “padrejtësive ndaj UÇK-së”.
Gjatë ditës, edhe presidentja e Kosovës, Vjosa Osmani, kaloi kufirin në Vërmicë dhe më vonë u mësua se ka udhëtuar për në Shqipëri për çështje private.
Tirana është sot qendra e thirrjeve për drejtësi ndaj ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi, si dhe ish-deputetit Rexhep Selimi, të cilët po mbahen prej pesë vitesh në paraburgim nën akuzat për krime lufte.