Gjykata e Tiranës ka vendosur sot heqjen e masës së pezullimit nga detyra ndaj drejtorit të Agjencisë së Mbikëqyrjes Policore (AMP), Florian Sulejmani.
Vendimi vjen pasi një gjykatë në Berat shpalli moskompetencën për këtë çështje. Në seancën me dyer të mbyllura, prokurori deklaroi se nuk ekzistojnë kushtet që të justifikojnë vijimin e pezullimit. Sipas tij, urdhri i Sulejmanit për transferimin e dy oficerëve të policisë gjyqësore në Dibër dhe Fier nuk ka shkaktuar pasoja, pasi postet mund të mbusheshin nga të tjerë oficerë.
Florian Sulejmani ishte pezulluar më 16 prill me urdhër të Prokurorisë së Beratit, nën akuzën për “Shpërdorim detyre”, pasi dyshohej se kishte transferuar oficerë në kundërshtim me ligjin. Prokuroria kishte argumentuar se ekzistonte një dyshim i arsyeshëm i mbështetur në prova dhe se transferimet binin ndesh me dispozitat ligjore për funksionimin e Policisë Gjyqësore dhe AMP-së.
Megjithatë, zhvillimet e fundit në Gjykatën e Tiranës rrëzuan masën e pezullimit, duke i hapur rrugë rikthimit të Sulejmanit në detyrë.