Gjyqtari i njohur amerikan, Frank Caprio, i cili u bë simbol i dhembshurisë në sallën e gjyqit, është ndarë nga jeta në moshën 88-vjeçare. Lajmi u konfirmua nga familja e tij përmes një deklarate në rrjete sociale, raporton CNN.
Caprio shërbeu për katër dekada në Gjykatën e Qarkut në Providence, pasi u emërua gjykatës në vitin 1985. Ai fitoi famë botërore për qasjen e tij njerëzore dhe të ngrohtë ndaj drejtësisë, duke u bërë i dashur për publikun nëpërmjet serialit televiziv “Caught in Providence”, i cili në vitin 2021 u nominua për çmimin prestigjioz “Daytime Emmy Award”. Klipet nga seancat e tij gjyqësore, ku ai dëgjonte me kujdes dhe trajtonte me empati historitë e qytetarëve, u bënë virale në mbarë botën.
Në janar 2023, Caprio njoftoi largimin nga detyra, ndërsa në fund të atij viti iu diagnostikua kanceri i pankreasit. Pas një beteje të gjatë dhe të guximshme, ai ndërroi jetë në paqe, siç thuhet në deklaratën e familjes.
“Gjykatësi Frank Caprio u nda nga jeta në paqe, pas një beteje të gjatë dhe të guximshme me kancerin. Ai ishte i dashur për dhembshurinë, përulësinë dhe besimin e palëkundur në mirësinë e njerëzve. Përmes punës së tij, ai preku jetët e miliona njerëzve dhe la pas një trashëgimi të thellë të mirësisë dhe drejtësisë. Do të kujtohet jo vetëm si një gjykatës i nderuar, por edhe si bashkëshort, baba, gjysh dhe mik i përkushtuar,” shkruan familja.
Në nder të tij, familja u ka bërë thirrje të gjithëve që të përhapin më shumë dhembshuri – ashtu siç bënte ai çdo ditë të jetës së tij.