Së fundmi është zbuluar se kompanitë në pronësi të Hekuran Brahimaj dhe Turjan Hysko do të marrin 77 mijë metër katrorë tokë shtetëtore falas në bregdetin e Lukovës.
Kjo që ata të ndërtojnë hotele dhe një fshat të madh turistik.
Komiteti i Investimeve Strategjike në mbledhjen e fundit miratoi statusin “Investitor Strategjik, Proçedurë e Veçantë” për projektin e investimit Atara Resort & Villas.
Kompanitë zhvilluese të këtij projekti janë Lukova Bayside Hotel & SPA shpk si dhe TO 27 Construction.
Kompania e parë zotërohet nga dy aksionerë. Hekuran Brahimaj, ish-kryetari socialist i Bashkisë së Vorës zotëron 65 të aksioneve, ndërsa pjesa tjetër prej 35% e aksioneve zotërohet nga Turjan Hysko, vëllai i ish-deputetit socialist dhe kryetar i FRESSH, Eljo Hysko.
Kompania e dytë, TO 27 Construction mësohet se zotërohet 100% nga Turjan Hysko, të cilin publiku e njeh si moderator në ekranet e televizioneve.
Projekti i investimit parashikon ndërtimin e një resorti turistik luksoz me vlerë 50 milionë euro, i cili do shtrihet në një sipërfaqe prej rreth 158 mijë metrash katrorë truall.
Sipas vendimit të Komitetit të Investimeve Strategjike, projekti përfshin një sipërfaqe prej 41,915 m2 në pronësi private të subjekteve aplikuese dhe një sipërfaqe prej 76,950 m2 në pronësi shtet.
Sakaq, subjektet për një sipërfaqe prej 39,009 m2 janë në fazë negociatash me subjekte private.
Komiteti i Investimeve Strategjike i kryesuar nga Edi Rama ka miratuar në parim dhënien falas të sipërfaqes prej 77 mijë metër katrorë tokë shtetërore për dy kompanitë.
“Miratohet në parim masa mbështetëse vënie në dispozicion të pasurisë së paluajtshme shtetërore me sipërfaqe prej 76,950 m2, në ZK. 2518, e zërit kadastral “ullishte” dhe “pemtore”, vetëm pasi të jenë kryer të gjitha verifikimet e nevojshme dhe konfirmimet nga Agjencia Shtetërore e Kadastrës përsa i përket saktësimit të vendndodhjes (parcelat e detajuara), sipërfaqes, statusit të tyre juridik dhe për aq kohë sa nuk ekzistojnë mosmarrëveshje administrative dhe/ose gjyqësore me shtetin në pasurinë objekt të investimit strategjik,” thuhet në vendimin e KIS.
