Presidenti amerikan Donald Trump i ka dhënë Iranit një afat prej 48 orësh për të rihapur Ngushticën e Hormuzit, duke paralajmëruar se në të kundërt Shtetet e Bashkuara do të ndërmarrin sulme ndaj termocentraleve iraniane.
Në një postim në platformën Truth Social, Trump theksoi se Teherani ka kohë deri më 23 mars në orën 23:44 GMT për të përmbushur kërkesën.
“Nëse Irani nuk e hap plotësisht, pa kërcënim Ngushticën e Hormuzit brenda 48 orëve, Shtetet e Bashkuara do të godasin dhe shkatërrojnë centralet e tyre elektrike, duke filluar nga më i madhi,” shkroi ai.
Ngushtica e Hormuzit mbetet një nga pikat më të rëndësishme për furnizimin global me energji, pasi në kohë paqeje rreth 20% e dërgesave botërore të naftës dhe gazit natyror të lëngshëm kalojnë përmes saj.
Nga ana tjetër, autoritetet në Teheran kanë paralajmëruar se nëse vendi sulmohet, do të shënjestrojnë infrastrukturën energjetike të lidhur me SHBA-në në të gjithë rajonin e Gjirit.
Tensionet në këtë korridor strategjik kanë ndikuar drejtpërdrejt në tregjet ndërkombëtare, duke shkaktuar rritje të ndjeshme të çmimeve të naftës gjatë javëve të fundit.