Presidenti amerikan Donald Trump ka lënë të kuptohet se autoritetet federale të emigracionit mund të tërhiqen nga Minneapolis në një moment të ardhshëm, duke theksuar se ata kanë bërë një “punë fenomenale”, pa specifikuar një afat kohor.
Ai ka njoftuar gjithashtu se Tom Homan, një drejtues i lartë i administratës për çështjet kufitare, do të vizitojë Minnesota, ndërsa qyteti po përballet me protesta masive pas vrasjes së Aleks Pretti të shtunën.
Sekretarja e Sigurisë Kombëtare, Kristi Noem, e ka mbështetur publikisht Homan dhe ka deklaruar se ai do të largojë nga rrugët “të huajt e dhunshëm, kriminelë dhe të paligjshëm”.
Ndërkohë, Sekretarja e Shtypit e Shtëpisë së Bardhë, Karoline Leavitt, ka theksuar se presidenti ka “besim të plotë” tek Noem. Ligjvënësit republikanë po ushtrojnë presion mbi administratën Trump për një hetim më të thellë mbi vdekjen e Prettit, 37-vjeçarit që u qëllua për vdekje gjatë një përplasjeje me Patrullën Kufitare.
Autoritetet lokale e kundërshtojnë versionin e Noem, sipas të cilit Pretti iu afrua oficerëve me një pistoletë gjysmëautomatike dhe reagoi me dhunë.