Presidenti i SHBA-së, Donald Trump, në fjalimin e tij në Asamblenë e 80-të të Përgjithshme të OKB-së, kritikoi ashpër politikat e emigracionit të vendeve të tjera dhe akuzoi organizatën ndërkombëtare për “financimin e një sulmi ndaj vendeve perëndimore”.
“Është koha për t’i dhënë fund eksperimentit të dështuar të kufijve të hapur. Duhet t’i jepni fund tani,” tha Trump, duke paralajmëruar se “vendet tuaja po shkojnë drejt ferrit”.
Ai shtoi se Evropa po përballet me një situatë serioze: “Po i shkatërroni vendet tuaja. Ato po shkatërrohen. Evropa është në telashe serioze, e pushtuar nga një forcë emigrantësh të paligjshëm që askush nuk e ka parë më parë. Të huajt e paligjshëm po vërshojnë në Evropë.”
Trump vlerësoi përpjekjet e tij për të frenuar emigracionin dhe u shpreh se liderët e huaj do të ishin të mençur t’i ndiqnin masat e tij, përndryshe, sipas tij, “vendet tuaja po shkatërrohen”.