Ish-presidenti amerikan Donald Trump ka mohuar çdo lidhje me Jeffrey Epstein, duke deklaruar se nuk ekziston asnjë provë që e implikon atë apo figura të tjera të fuqishme në këtë çështje.
Në një postim në platformën e tij Truth Social, Trump pyet pse demokratët nuk kanë publikuar asnjë provë gjatë kohës që kanë qenë në pushtet, nëse një e tillë ekziston vërtet. Ai thekson me tone të forta se kjo nuk ka ndodhur sepse “nuk kanë asgjë”.
Me këtë deklaratë, Trump përpiqet të zbehë spekulimet për një të ashtuquajtur “listë të fshehtë klientësh” të Epstein, që thuhet se përfshin emra të rëndësishëm të politikës dhe biznesit.
Deri më tani, asnjë prej këtyre pretendimeve nuk është konfirmuar zyrtarisht, ndërsa skandali Epstein mbetet një nga çështjet më të errëta dhe të diskutuara në skenën publike amerikane.
Trump urdhëron publikimin e dokumenteve për Epstein mes rritjes së presionit
Presidenti amerikan Donald Trump ka njoftuar se ka urdhëruar Departamentin e Drejtësisë të publikojë më shumë dokumente gjyqësore që lidhen me hetimin mbi Jeffrey Epstein, pas presionit të shtuar nga disa prej mbështetësve të tij më besnikë.
Në përgjigje, Prokurorja e Përgjithshme Pam Bondi deklaroi: “Jemi gati të kërkojmë nesër nga gjykata hapjen e transkripteve të jurisë së madhe.”
Nuk është ende e qartë nëse bëhet fjalë për dosjet e hershme të çështjes Epstein nga fillimi i viteve 2000, apo për akuzat federale të ngritura në vitin 2019 – Shtëpia e Bardhë nuk ka dhënë sqarime.
Gjithashtu, kjo nuk do të thotë domosdoshmërisht se dokumentet do të publikohen menjëherë.
Javën e kaluar, Bondi theksoi se Departamenti i Drejtësisë nuk beson se Epstein kishte një “listë klientësh” që mund të implikonte figura të njohura dhe se ai kishte kryer vetëvrasje – përkundër teorive të shumta konspirative që qarkullojnë prej vitesh.
Vendimi i Trump erdhi menjëherë pasi ai tha se do të padisë Wall Street Journal-in për një raport që përmend emrin e tij në një kartolinë të vitit 2003 dërguar Epstein-it me përmbajtje vulgare. Sipas gazetës, kartolina përmbante një tekst të shtypur, të rrethuar nga konturet e një gruaje nudo, të vizatuara me shënues të trashë.
“Këto nuk janë fjalët e mia, as mënyra si flas. Gjithashtu, unë nuk bëj vizatime,” tha Trump.
Kush ishte Jeffrey Epstein?
Para se të bëhej figura qendrore në një çështje të profilit të lartë për trafik seksual, Jeffrey Epstein ishte mësues matematike dhe financier i fuqishëm në qytetin e Nju Jorkut.
Duke u shoqëruar me njerëz të pasur dhe të famshëm përmes avionëve privatë dhe festave luksoze gjatë viteve 1980, biznesi i Epstein u rrit duke menaxhuar qindra miliona dollarë në pasuri të klientëve.
Ndër të famshmit me të cilët ai shoqërohej ishin presidenti amerikan Donald Trump, ish-presidenti Bill Clinton dhe princi Andrew.
“Kam njohur Jeff-in prej 15 vitesh. Djalë fantastik,” i tha Trump revistës New York në vitin 2002.
Në vitin 2005, prindërit e një vajze 14-vjeçare njoftuan policinë në Florida se Epstein kishte ngacmuar seksualisht vajzën e tyre në shtëpinë e tij në Palm Beach. Ai shmangu akuzat federale dhe në vend të tyre mori një dënim me 18 muaj burg.
Që nga viti 2008, Epstein ishte regjistruar si shkelës seksual në nivelin tre në listën e shtetit të Nju Jorkut – një klasifikim i përhershëm që nënkuptonte rrezik të lartë për të përsëritur veprën.
Në korrik 2019, ai u arrestua në Nju Jork për akuza mbi trafikim seksual, i dyshuar për drejtimin e një “rrjeti të gjerë” vajzash të mitura për qëllime seksuale.
Pas refuzimit të kërkesës për lirim me kusht, ai u mbajt në Qendrën Korrektuese Metropolitane të Nju Jorkut, ku u gjet i vdekur në qelinë e tij disa muaj më vonë.