Presidenti i Shtetet e Bashkuara të Amerikës, Donald Trump, ka vendosur të largojë Richard Grenell nga drejtimi i John F. Kennedy Center for the Performing Arts dhe ta zëvendësojë atë me Matt Floca.
Lajmin Trump e bëri të ditur përmes një postimi në Truth Social, ku theksoi se Floca, aktualisht nënkryetar i operacioneve të ambienteve të qendrës, pritet të marrë detyrën e Drejtorit Operativ dhe Drejtorit Ekzekutiv, nëse emërimi i tij miratohet nga bordi drejtues.
“Jam i kënaqur të njoftoj se Matt Floca, në varësi të miratimit nga Bordi i Drejtorëve, do të emërohet Drejtori Operativ dhe Drejtori Ekzekutiv i Qendrës TRUMP KENNEDY. Si Zëvendëspresident i Operacioneve, Matt na ka ndihmuar të arrijmë përparim të jashtëzakonshëm në ngritjen e Qendrës në nivelin më të lartë të ekselencës”, shkroi Trump.
Mandati i përkohshëm i Richard Grenell në krye të qendrës është shoqëruar me polemika dhe vështirësi, përfshirë anulime të disa shfaqjeve, protesta, rënie të shitjeve të biletave dhe probleme financiare.
Sipas raportimit të CNN, burime nga Shtëpia e Bardhë kanë bërë të ditur se Trump ishte i pakënaqur me mënyrën se si Grenell kishte menaxhuar drejtimin e qendrës, veçanërisht në lidhje me strategjinë e publicitetit, dhe ishte acaruar me të gjatë ditëve të fundit.